كان نفسي اكتب البوست ده اول ما ارجع من صلاة العيد
بس كنت مطبق ومش قادر لاني تقريبا كده لفيت المحله كلها
انا فرحان اووووووووووووي فرحان بجد .. فرحان من قلبي
لاول مره من عشر سنين العيد يجي عندي
لاول مره من عشر سنين انزل اصلي العيد
بقالي كتييييييييير اووي مشفتش كم البشر ده
بقالي كتيييييييييييييييييييييييييييييييير اووووي مشفتش الناس فرحانه كده
صوت الناس وهم بيرددوا تكبيرات العيد كان بيهزني وبيبهجني ف نفس الوقت
بيحسسني بالعيد
لما تروح مكان بعييييييييييييييييد عشان تصلي فيه وطول الطريق تشوف ناس على الناحيتين .. الناس دي رايحه والناس دي جايه
بَشَر من كل الاعمار
العيال الصغيرين وهم لابسين الجلاليب البيضا الجمييييييييله
والفرحه هتنط من عينيهم
الرجاله ومراتاتهم متشعلقين ف دراعاتهم
البنات الصغيرين القمرات وهم ماسكين البلالين الملونه
الشباب الصغير والتخميس بالفزب
البنات الحلوه المتزوقه على سنجة عشره
ومستنيين يتعاكسوا بعد الصلاه
انا تقريبا كده سلمت على يجي ميتين واحد
وبوست وحضنت يجي سبعين
واغلبهم معرفهمش
كلنا فرحانين وبنعيّد على بعض
قابلت ناس مشفتهاش من سبع سنين
قابلت اصحابي اللي لحقتهم ف اخر خمس ايام اعتكاف
بعد ما صلينا بقول لاصحابي مش يالا بقى
قالولي يالا بقى ايه؟
قلتلهم يالا بقى نمشي
واحد منهم قالي طب والخطبه
قلتله خطبة مين ياحاج ؟؟
قالي خطبة العيد بتبقى بعد الصلاه
صباح الفل انت نسيت ؟؟؟
هههههههههههههههههههههههههههههههههههههههه
يالهوووووووووووووووووووي انا نسيت ياجدعان
معلش بقى اصلي بقالي سنين فعلا منزلتش اصلي العيد
نظرا لظروف صحيه صعبه
والعيد بالنسبالي كان فوتوشوب
الشيخ اللي قال الخطبه تقريبا كده اتكلم ف كل حاجه ف الحياه
اتكلم عن الصلاه والحجاب والرشوه والفساد والحشيش والمخدرات
والسياسه وبر الوالدين والحياه الزوجيه وكل حاجه .. كل حاجه
هو كان فاضل بس يقول ايه احسن مسلسل ف رمضان
والاهلي ليه ماكسبش ماتش المولوديه
كان في طفل صغنن قاعد قصادي واحنا بنسمع الخطبه
كان لابس عبايه مغربيه بيضا صغنتوته اووووي على قده
الطفل ده كان كل دوره انه يوزع الفرحه على اللي قاعدين
بيبص للناس ويضحكلهم
بيلاغي كل اللي حواليه
ضحكته تِشْرِح القلب
وشه طالع منه نور وبريق
يحسسك بالراحه والسَكينه
تحس برضا ربنا لما تبصله
ماشاء الله عليه
ربنا يحميه ويبارك فيه ويخليه لاهله يارب
الحمد لله .. الحمد لله
يارب لك الحمد والشكر يــــارب
ربنا كريم اوووي وبيفرحنا دايما
انا فرحان اوووووووووي وحياة ربنا
حاسس بفرحه معشتهاش بقالي سنين
حاسس بالفرحه حواليا ف كل حاجه
شامم ريحتــــــــــــــها ف الهـــــوا
ربنا يكملها على خير يارب
كل سنه وانتوا فرحانين
ويجعل ايامكم كلها اعياد
وفرحه وسعاده وهنــــا
يااااااااااااااااااااااااارب
No comments:
Post a Comment