الحياه .. تجربـه
مليئه بالتفاعلات
بالنتائـــــــــــــج
بعوامل الحفـــز
بالمثبطــــــــات
بالضغــــــــوط
بالمتغيــــــرات
موقوف نجاحـــــــــها
على كثير من العوامل
كالتركيز و التفكـــــك
التشبع .. التسامــــــــي
الإنحلال .. الدقـــــــــه
الإنصهار .. الإندمــاج
التصلب .. المقاومــه
التردد .. الفلتـــــره
نسبة الخطــــــــــــــــــــــأ
وارده.. مسموح بهــــــــــا
شريطة ألا تتعدى المحاذير
البعض في حياتنا كالماء
لا نستطيع العيش بدونهم
لا يمكن تخليقهم إصطناعيا
هم فقط من خلـــــــــق الله
والبعض كالأوكسجيـن
نتنفسهم .. نحيا بهــــم
هم حقاً لا يشتعلــــــون
لكنهم دائمــــــــــــــــــاً
يساعدون على إشتعالنا
والبعض كطبقة الأوزون
يحيطون بِنـــــــــــــــــــا
يغلفون حياتنــــــــــــــــا
يقونا شرور الطبيعـــــه
وكل مانقدمه لهــــــــــم
ثقباً عميقاً في صميم أنفسهم
البعض يُشبه العناصر
في سلوكهــــــــــــــا
فالبعض نشــــــــــط
والآخر خامـــــــــل
والبعض متوهج ومُشع
والبعض متوهج ومُشع
البشر ف تفاعلاتهم كالأملاح
هناك من يتفاعل بالذوبان
يذوبون فينا ونذوب فيهم
وهناك مَن يندمجون معنا حد الإنصهار
وبعضهم صلب متجمــــــــــــــــــــد
يصعب تفاعلــــــــــــــــــــــــــــــــه
ومنهم اللين سهل العســــــــــــــــــر
والصلب سهل الكســــــــــــــــــــــر
البعض في تكوينهــــــــــم
يشبهون البللـــــــــــورات
منهم النقي المنتظم التكوين
ومنهم العشوائــــــــــــي
المليء بالشوائــــــــــب
البعض كالأكاسيد والأملاح
منهم شحيح العطاء
ومنهم الغني في عطيته
البشر كالمحاليـــــــــل
منهم مَن يتعكر بسهوله
والأخر يظل شفافاً نقياً
مهما زادت الشوائب
كثيرون في حياتنا
عديمي الطعم واللون والرائحه
وقليلون لهم طعم الحياه
نكهة السعاده
لون التفاؤل
رائحة الأمل
هم لنا اكسير الحياه
الناس في تأثيرهم كالشحنات
البعض يمنحك شحنه موجبه
والآخر يمنحك شحنه سالبه
وأكثرهم متعــــــــــــــــادل
الناس في معدنهم كالأحجار
بعضهم نفيس
نادر الوجود
خواصهم أصيله
طبيعيه .. لا تُكتََسَب
إذا صادفك أحدهم
فأنت قطعاً من الأثرياء
وبعضهم رديء
يملأ الأسواق
خواصهم مزيفه
مصطنعه .. كلها مُكتَسَب
إذا صادفك أحدهم
فلتتخلص منه سريعاً
البعض كالسيانيــــــد
سام .. قاتـــــــــــــــل
سام .. قاتـــــــــــــــل
لا يَقتُل بمجرد وجوده
هو يتخلل كيانك أولاً
فيتوحد معـــــــــك
ثم يفتك بك بالنهايه
علاقاتنا كالتفاعلات
منها البسيطه
ومنها المُركبه
منها المباشر
والتلقائــــــي
ومنها الإضافه
ثم يليها النزع
نتائجها قد تكون مثمره
وأحياناً تنتهي بإنفجــار
العقل في عمله كالإلكترون
يفقد.. يكتسب .. يشارك
هو دائما يعمل
لا يتوقف أبداً
رغبته عارمه في الإستقرار
القلب في أهميته كالنواه
هوالمركز
الجميع يدور في فلكه
حتى العقل يخضع له
إذا إستقر
نتج عنه طاقه سلميه
إذا تحطم
نتج عنه إنشطارنووي
الحياه في مضمونها
تشبه كثيراً الأكسده والإختزال
فهي عباره عن فقد وإكتساب
العامل فيها عكس العمليه
قد يضرك شخص
لكن في حقيقة ضرره .. نفع
وقد ينفعك شخص
لكن في حقيقة نفعه .. ضرر
الحياه بطبيعتها كتجربه
تخضع لكل الاحتملات
قد يبهرك نجاحهــــــــــا
وقد يقضي عليك فشـلهـا
لا حيلة لنا معها سوى العمل
الصبر.. الدأب ..الإجتهاد
البحث .. الخيال .. الأمل
الإتقان .. المثابره .. العزيمه
أما التوفيق فمن عند الله
الحياه .. تجربه
قد تنجح .. وقد تفشل
4 comments:
ازيك يا محمد ؟
يارب تكون بخير
انا عايزة أبدي _ تاني _ إعجابي باللي بتكتبه
على فكرة انا بقرا بس مش بعلق
او بمعنى ادق بكتب تعليق وبعد ما بخلص الاقيه طويييييييييل
والاقينى دخلت فى حاجت شخصية
فبمسح التعليق واكتفي بالقراية
النهاردة هحاول اكتب تعليق مختصر علشان متزهقش مني
البوست حلو
ده مبدئيا
انا بس عايزة اضيف حاج
ان الانسان ممكن يكون كل الحاجات دى
يعنى مثلا
ممكن تلاقي واحد يكون عند شخص ما
زى الاحجار الكريمة
يكون غالى عنده اوى
وهو بيه غني جداااا
وهو نفس الشخص يكون عند شخص اخر رخيص اوى
و من جواه عايز يتخلص منه فى اول فرصة تسمح له بده
يعنى الانسان نفسه بيتغير حسب البيئة المحيطة به
مفيش ناس بتجتمع على حاجة واحدة
لا يمكن ابدا كل اللى حوالينا يجتمعوا على شخص واحد انه رخم
او انه كريم
او انه معطاء وخدوم
او انه ندل
كل واحد مننا جواه كل الحاجات دى
انا مش عايزة اطول اكتر من كدة
بس اظن ان وجهة نظري وصلت
حلو البوست
وانت بتكتب حلو اوى على فكرة
واسلوبك مميز فعلا
خد بالك من نفسك
سلام
اختك نورا
الحمد لله يا نورا .. انا بخير وزي الفل
وربنا يكرمك على ذوقك يارب
بس على فكره بقى انا زعلان منك
مش احنا اخوات ؟؟
هو في بقى ما بين الاخوات .. متزهقش مني وتعليق طويل والكلام اللي يزعل ده
اومال احنا اسمنا اخوات ليه .. مهو عشان نقف جنب بعض لو في شده
- لا قدر الله -
ونحكي ونفضفض باللي جوانا .. سواء كان اللي جوانا ده حاجه
شخصيه او حاجه عامه
واصلا اصلا انا بتشرف انك بتعلقي على حاجه انا كاتبها
وبستمتع بتعليقاتك وبستفيد منها جدا
ومش بزهق من التعليقات الطويله خاااالص على فكره لان انا اصلا بكتب تعليقات طويله علطول نياهاهاهاهاهاع
علقي براحتك يانورا واعرفي اني بعتبرك اختي بجد مش مجازا
اما عن البوست فوجهة نظرك وصلت و بتفق معاكي ف جزئية الناس مش بيجتمعوا على حاجه واحده
لكن اسمحيلي اختلف معاكي ف جزئية الانسان بيتغير على حسب البيئه المحيطه
بيه
صحيح احنا جوانا خير وشر وجدعنه ونداله وكل المتناقضات دي عشان دي طبيعتنا البشريه اللي فُطرنا عليه
بس ده مش معناه ان معدنّا وحش ولا
معناه اننا بنتغير حسب البيئه المحيطه بينا
رؤية الناس لينا ورأيهم فينا هو اللي بيتغير على حسب اهوائهم وظروفهم وعقليتهم لكن احنا زي ما احنا مبنتغيرش
زي الدهب مثلا
وهو ف الجبل او ف بطن الارض بيبقى عباره عن حبيبات وصخور شكلها مش جميل
ومليانه شوائب .. لو حد من الناس شاف الدهب ف الحاله دي مش هيعرفه اصلا ولا هيعجب بيه وبالتالي مش هيعرف قيمته
لكن لما بيُستخلَص ويتنقى م الشوائب ويتوفرله الشكل اللي يليق بيه
كل الناس هتتهافت عليه وهيعرفوا قيمته قطعا
موقف الناس متناقض ف الحالتين برغم ان
" معدن الدهب هو هو "
لكن ادراك الناس وفهمهم ومدى استفادتهم هو اللي بيفرق
ف رايهم
ومش معنى ان حد شايفني وحش .. يبقى انا وحش فعلا .. يمكن الحد ده اذاني ولا ظلمني ولا هان كرامتي فبالتالي مينفعش اسكت لازم اخد حقي بالادب والاصول
هو بقى عاوز يشوفني وحش .. براحته
خلاصة الكلام ده كله ف رايي المتواضع جدا
البيئه المحيطه هي اللي بتتغير لكن الانسان عمره ما بيتغير
ده اذا كان فعلا معدنه اصيل
الدهب صفاته هي هي سواء كان ف الجبل او ف الفاترينه
والانسان الاصيل .. صفاته ومواقفه ثابته مهما اتغيرت البيئه والظروف
شفتي بقى !! تعليقاتك بتفَتَّحلي حاجات مفكرتش فيها قبل كده
وتعليق مقالي اهوه ويارب انتي بقى متزهقيش
وبجد والله حاجات كتييير ومهمه ف التدوين اتعلمتها منك
ربنا يسعدك يانورا ويكرمك يارب على ذوقك كمان مره
ازيك يا محمد
مممممممممممممممممممممممممممممم
طيب بص انا هاوضح وجهة نظري اكتر
فى الحتة اللى انت مختلف معايا فيها
انا عايزة اقول ان الانسان بتأثر عليه عوامل خارجية بتخلى الناس تشوفه كويس او وحش
يعنى مثلا انت مبتحبش البواب لانك تعرف عنه مثلا انه بيعمل اى حاجة غلط من وجهة نظرك
فمثلا مش بتديله فلوس كتير او يجى العيد مش بتديله عيدية زي باقي جيرانك
فهو ياخد عنك فكرة انك بخيل
رغم ان عم محمد الخضرجي بيحبك جدا وانت بالنسباله اكرم راجل هو شافه لانك بتسبغ عليه العطاء وبتسيبله بقشيش كتير
انت نفس الشخص
لكن تصرفاتك متغيرة حسب انت موجود مع مين
لما بتكون موجود مع البواب انت بتتحول لبخيل
لان البواب من وجهة نظرك مايستحقش ياخد اى مكافأة
ومع الخضرجي
انت بتكون راجل كريم جداااا
انت لو قاعد عند ميكانيكي وبتصلح عربيتك
هتلاقي الفاظك اتغيرت وبقت عاملة زى لهجة المعلمين شوية
لانك بتتعامل مع صنايعية
اما لو قاعد وسط زمايلك الدكاترة والمهندسين و المدرسين
هتلاقي لهجتك اختلفت
وطريقة التعامل اختلفت
ومن طريقة تعاملك مع جميع الناس فى مختلف المواقف
الناس هتحكم عليك اذا كنت كويس ولا وحش
ممكن عند الصناعيية
واحد يشوفك راجل مجدع
والتانى يشوفك مش فاهم حاجة وبتتمنظر عليهم
وفي مجتمع اصحابك
واحد يشوفك ظريف ودمك خفيف ومحترم
والتانى يشوفك رخم وبتحب الظهور
وهكذا دواليك
يعنى اللى انا عايزة اقوله
ان احنا غصب عننا بنتحول حسب المكان والصحبة
بص هاديلك مثال
انا من ايام الجامعة وانا منفتحة شوية فى الفاظي مع اصحابي
وبهرج بطولة لسان
بس ده بينى وبينهم بس طبعا
المهم ان حصل موقف اضطرنى انى اتصل بالبيت
فكان معايا واحدة صاحبتى
بابا _ الله يرحمه _ هو اللي رد عليا ساعتها
فانا رديت عليه وقلتله
ايوة يا بابا ازي حضرتك
حضرتك عامل ايه
بابا بعد اذنك ممكن كذا كذا كذا
وخلاص قفلت السكة
ولاقيت صاحبتى دى واقفة بتبصلي باذبهلال جدا ومندهشة اوى
وبتقولى ايه ده
ايه ده
بقى انتى نورا
انتى اللى عمالة تلسوعينا بلسانك اللى عايز قطعه
بتقولى حضرتك وبعد اذنك ؟
انا كنت مستغربة استغرابها
قلتلها يا بنتى لكل مقام مقال
ده ابويا
عايزانى اقوله ايه؟
ماهو لازم طبعا اكلمه باحترام
ولازم الفاظى المستخدمة معاه تكون فيها صيغة احترام وتوقير
لكن انتوا اصحابي
اطول لسانى معاكم زى ما انا عايزة
صاحبتى دى
انطباعها عنى اتغير من يوم المكالمة اياها
كانت واخدة عنى انطباع ان نورا مجرمة ومجنونة ولسانها طويل
بس لما شافتنى بتكلم مع بابا
خدت عنى انطباع انى محترمة جدااااا وجد جدااااا
وانى بس كل الحكاية بفصل طريقتى واسلوبي حسب المكان وحسب الصحبة
يعنى يا محمد
انا نفس الشخص اهو
لكن انا بتغير حسب انا قاعدة فين ومع مين
اكيد فيه حاجات ثوابت فى الشخصية مش بتتغير ابدا
زى مثل لو الانسان ده محسوك حبتين فى موضوع النضافة
هتلاقيه فى اى مكان ومع اى حد هتلاقيه برضه مازال محسوك فى النضافة
بس عادة طريقة التعامل مع الناس واسلوب الكلام بيتغير
وعلى الاساس ده الناس بتحكم علينا
اذا كنا كويبسين ولا وحشين
ها
وجهة نظرى وصلت ولا لسة؟
انا حاسة انى رغيت كتير فعلا
وانك بجد زهقت منى المرة دى
خد بالك من نفسك
سلام
اختك نورا
ازيك يانورا .. عامله ايه؟؟
اولا كل سنه وانتي بخير وطيبه
وربنا يجعل ايامك كلها فرح واعياد
ثانيا
تماااااااام .. وجهة نظرك وصلت جداا
وانا شايف ان احنا كده متفقين ان
الظروف فعلا " بتبروز " تصرفاتنا وشخصياتنا اما ف صوره كويسه او وحشه
"من وجهة نظر الناس "
وان الثوابت والقناعات اللي ف شخصية الانسان مبتتغيرش مهما حصل
واللي بيتغير هو اسلوبه فقط لا غير
او بمعنى ادق ردود افعاله بتتغير حسب الظروف المحيطه به
مش قناعاته ولا صفاته ولا اخلاقه
بمعنى ..البواب اللي انا مبحبوش عشان بيغلط وبالتالي انا مش بكون كريم معاه
وهو شايفني بخيل .. هنفترض جدلا ان البواب ده ف ضيقه .. مراته بتعمل عمليه مثلا.. موقفي هيبقى ايه ساعتها ؟؟
هل هفضل بخيل زي ما هو شايفني
ولا هساعده بكل اللي اقدر عليه؟؟
اكيد طبعا هساعده
طب ليه مع انه ميستاهلش
هنا بقى لُب الموضوع يا نورا
احنا كبشر بتحركنا مجموعة من القيم والاخلاق اللي اتزرعت جوانا واللي اتربينا عليها
يبدو عليّا ظاهريا ان انا بخيل معاه وانا بعمل كده فعلا.. بس مش عشان انا اصلا بخيل .. لأ عشان بحاول اخد موقف من غلطه ومكونش سلبي او حتى مخنوق منه ومش مرتاحله فمش هديله فلوس او بحاول اثنيه عن غلطه ده
بدافع الثواب والعقاب اللي اتربينا عليه وبدافع الانصاف والحق
-مع ان ده مش دورنا-
لكن لما بيمر بازمه بقف جنبه بدافع الرحمه والانسانيه
انا شايف ان انا
في كلتى الحالتين متغيرتش برغم الاولى ابان بخيل والتانيه كريم
مبادئي ثابته وهي الدافع و المحرك لتصرفاتي
بيبان شكلي ايه او
الناس بتفسر تصرفاتي دي صح او غلط .. ده لا يعنيني ف شيء طالما برضي ربنا ..يبقى ميهمنيش حد
وهكذا بتاع الخضار لو اكتشفت مثلا انه مبيصرفش على بيته او مبيوديش ولاده المدارس ...اكيد " تعاملي " معاه هيختلف و كده بردو انا متغيرتش
اظن كده احنا متفقين؟؟
انتي بتقولي ان الانسان بتأثر عليه عوامل خارجية " بتخلى الناس تشوفه كويس او وحش "
وانا بقول رؤية الناس لينا ورأيهم فينا هو اللي بيتغير على حسب اهوائهم وظروفهم وعقليتهم لكن احنا زي ما احنا مبنتغيرش
زي ما تفضلتي وقلتي لكل مقام مقال
يعني ف وَسَط الصنايعيه اغلبهم اسلوبهم مش كويس فبالتالي لازم اتكيف واتاقلم عشان مياكلونيش ويسكوني على قفايا
انا كده بحافظ على حقي
لكن مبيغرش اسلوبي مجاراة ليهم
او عشان ابان حِدق ومدقدق وصايع
لكن لو رحت ورشه تصليح سيارات واللي ماسكها رجل متحضر سواء كان مهندس او صنايعي حتى .. اكيد هتعامل باسلوبي الطبيعي لان معدش فيه شيء يضطرني اغير من " اسلوبي "
وبنفس المنطق
زي ما انتي بتتعاملي مع اصحابك بمقتضى السن والصداقه وانطلاق الشباب
بتتعاملي ف البيت بمقتضى البنوه والاحترام والتوقير
انتي زي ما انتي متغيرتيش.. بتحطي الامور ف نصابها الصحيح .. مش اكتر ولا اقل
فهم الناس ورايهم هو اللي بيتغير
لان " اغلبهم " بيحكموا بالظاهر وبنظره برجماتيه بحته
انا شايف ان احنا مبنتحولش ولا حاجه على حسب المكان والصحبه
احنا بنتاقلم وبنتكيف مع ظروف احنا مش متعودين عليها
بس واحنا محافظين على كامل قناعتنا ومبادئنا
ودي مش سفسطه والله
دي مجرد وجهة نظري .. ومقتنع بيها
يارب تكون وصلت
آآه صحيح انا مدخلتش نت من امبارح ولقيتك رافعه كومنتات بوست حسبة الموت
هو انتي علقتي عليها اصلا ؟؟
كل عيد وانتي بخير وسعاده
وخدي بالك ع نفسك يانورا
Post a Comment