زحام اوهام

                       زحام أوهام ماليني ... ب ادعي اللهم ليني

هايجي يوم

                              ها يجي يوم وألاقيك

ليه كده ؟

هي الناس بقت وحشه ليه كده والكره والغل بقى كتيير ليه كده ؟؟ ليه كل ما تقابل حد بالخير يقابلك بالشر . ليه كل اما تحسن لحد يسيئلك . ليه كل اما تداوي جرح حد  بيبقى هو اول حد يجرحك . الواحد بيتمنى الخير للناس كلها وفي ناس بتتمناله الموت وبتشمت حتى ف المرض. نفسي أعرف هو ليه كده

حد يسمعني

اللي هيطاطي

               الدنيا بتحب اللي يكشِّملها
              اللي يقف قصادها ويتنّحلها
                انما اللي هيطاطي وينِخ
             يبقى بسلامته جِه على حِجرها

عمري ما بَسَلِّم

                      كل يوم بيعَدّي منه بتعلم
                     ساعات بَفرَح وكتير بتألِم
                       صحيح ممكن اتهزِم
                     بس أبداً عمري ما بَسَلِّم

بقايا إنسان

                             عَجّزت يا بني قبل الأوان

                         وطمسِت ملامحك قساوة الزمان

                           ويوم ما قررت ترجع صبي

                             كان خلاص فات الأوان

                          أصل معتش فاضل حاجه منك

                            غير يادوب .. بقايا إنسان

الفته الفته الفته

                         إلى كل البني آدمين

                        وخصوصاً المُدونين

                        منهم و الفيس بوكيِّين

                        كل سنه وانتم طيبيبن

                       ف اللحمه والفته غرقانين

                           للسينمات داخلين

                          ودريم بارك رايحين

                             او شرم طالعين

                          و ف الجناين قاعدين

                         وف الشوارع متجولين

                           و المراجيح راكبين  

                          او ع النواصي واقفين

                           اولأي حته خارجين

                           او حتى زي حالاتي

                            ف بيوتكم مئنتخين

                          يارب تفضلوا كده دايماً

                              بصحه وكويسين

                                 قولوا يارب

                                آمين......آمين

                            وكل سنه وانتم طيبين

ياللي فاكر نفسك فصيح

                    ياللي فاكر نفسك فَصيح
                   عَمّال تغني وتقول وتصِيح
                     على فكره لما تموت  
                    مَحدش هيعملَّك ضريح

رحلة علاج

قالي الطبيب رِجليك فيها إعوجاج

ولازم تسافر ف رحلة علاج

قلتله طب وإيه المشكله

طالما هعيش

بس ياريت أعيش فِ إبتهاج

ندل وجبان

    والنبي ما تعمليش فيها إنسان
  ما إنت عارف نفسك ندل وجبان
     وإضحك ع الناس كلها    
بس متحاولش مع حد عارفك من زمان

قوليها بصدقٍ

ما أنتي ببشرٍ ولا إنسان

لا تشعرين بفرح ٍ ولا أحزان

فقلبكي حجر ٌ كالجدران

وغضبكي ثورة ٌ كالبركان

أَحبكي ذنب أم عصيان؟

أقصة حب  أم عشق زمان؟

أتبغين الوصل أم الهجران ؟

قوليها بصدقٍ قوليها الآن

عجائب الفيس بوك السبعه

طبعا زي ما كلنا عارفين ان للفيس بوك فوايد كتيييره ومنها : انك تلاقي اصحابك بتوع ايام زمان , ايام الطفوله المشرده والصياعه المبكره , ومش بس دول لأ كمان بتلاقي اصحاب الجامعه الواطيين اللي معتّوش بتسالوا على بعض خالص وطِلعِت الحكايه مصلحه و ورق كورسات  وبس, وطبعا منقدرش ننسى دور الفيس بوك الفعال  ف حياة الولاد النايتي والبنات الفافي اللي بيعتبروه هو المصدر الرئيسي للأوزز والمزاميز واللي ميعرفش المصطلحات دي احب اقوله : الاوزز ( هي جمع أُوزَّه وهي  المُزه الصغيره 
والمزاميز ( هي جمع مُز). واكيد بيلعب دور البطوله ف حياة الناس الصيع اللي ملهمش لا شُغله ولا مشغله  ومتلئحين ليل ونهار( ع الفيس) بس والله احسن ما ينحرفوا
اهو بيلهيهم  وبيشغل وقت ضياعهم.. قصدي فراغهم ومننساش طبعا  اصدقائنا التافهين... المجانين  ... قصدي المعجبين اللي بيجدوا ضالتهم ف التواصل مع نجومهم الخنيقه ع الفيس بوك
والصُفح اللذيذه جدا زي( بختك يا ابو بخيت ) و(هتِجوِّزي امتي يابايره) و(انت مين ياااض ) و(للاغبياء فقط) و(خالتك مستكه للامثال  المهشتكه) والحاجات اللطيفه دي وحاجات تانيه كتييييييير بس كفايه دول 
 نيجي بقى لفوايد ه الحقيقيه
 والله فعلا الفيس بوك مهم  ومفيد لبعض الناس ومنهم الناس المتغربه الشقيانه اللي طالع ميتين امهم ف الغربه وما بيصدقوا يلاقوا جنس مخلوق يرازي فيهم ويرازوا فيه.. مَهُم مقطوعين هناك يا عيني  
ومفيد لحد بيعاني م الوحده ومبيلاقيش اصحابه المقاطيع غير ع الفيس بوك  
وطبعا مهم جدا ف صفح التوعيه و التكافل الاجتماعي زي صناع الحياه وحملات التبرع بالدم ومستشفى سرطان الاطفال والصفح الدينيه المعتدله


وفي احيان قليله ونادره بتقدر تكوِّن صداقات حقيقيه
وساعات بيكون متنفس حقيقي بيخرج فيه البعض طاقته وارائه وتعليقاته وافكاره
وكمان ف التواصل الانساني لبعض الناس اللي عندهم رُهاب اجتماعي
او مفيد حتى كوسيله للترفيه. وبردو في حاجات تانيه كتييييييييييييير
معلش هي كانت مقدمه طويله و بايخه بس لا بد منها
هو انتوا يعني داخلين تاخدوا غرضكوا وتمشوا كده علطول  من غير ما ارغي معاكم شويه

المهم :

زي ما قلت من شويه صغننين ان الفيس بوك ممكن يلهي او يمنع بعض الناس عن الانحراف الا انه احيانا  بيكون هو نفسه وسيلة الانحراف . فاهمين حاجه ؟؟؟ طبعا لأ 

طيب ركزوا معايا بقى 

علشان احنا دلوقتي هندخل ف الموضوع

                                                                            عجائب الفيس بوك السبعه

العجيبه الاولى :   (الواد السييييس )  ف يوم اخبر مطعلتوش شمس ولا ملامح وانا بفتح الاكونت بتاعي وداخل كده برجلي اليمين و بَسَمِّي - كالعاده يعني - فاذا بطلب صداقه جايلي وانا بطبعي مبقبلش اي طلب صداقه غير لما اشوف البروفايل بتاع صحبه الاول وهنا بقى كانت الطامة الكبرى فاذا بصورة عيل سييس ع البروفايل عنده يجي خمانشر سنه كده ولا حاجه واقف سلبوته ( بلبوص مَلط ) ومش لابس  حاجه غير نضارة غطس ....... بسسسسسسسس !!!!!!!!!!!

ههههههههههععععععععععععععععع هههههههههههههههععععععععععععععععععع

وضحكت عليكوا  ....  هوانا يعني مضحكتش عليكوا اوي لانه كان يادوب لابس حتة قماشه كده اللي بيقولوا عليها اسمه ايه  ده ( المايوه ) يعني مفرقشت كتييييرر فقلقت كده م المنظر والفار بدا يقرقض ف رجلي وقلت ايه ده بقى؟؟؟؟ بس رجعت فكرت شويه وقلت لالالالالالا حرام عليك يا خي( إن بعض الظن إثم) متظلمش 

الواد ما يمكن يكون سبّاح صغير وفرحان بالمايوه الجديد وبيتصور بيه عادي يعني - على اساس انه فاكر نفسه  مايكل فيليبس - اللي بيجيب لامريكا تمانيه دهب لوحده ف الاوليمبياد - ما علينا ... خلونا ف موضوعنا فقلت بردو يالا اتاكد وخلاص, فبضرب بعيني كده ع اليمين وبشوف اصدقائه  وما قولكوش بقى ع اللي شفته ؛   انها ((المفاجاه)) اللي خرعتني وكان هيغمن عليا  . ليه بقى ؟؟ قولتولي ليه... فاكرين فيلم عادل امام بتاع امير الظلام ؟ ايووووووووووووووون اسم الله عليكم

فريق الباكبوراتات  !!!!!!!!!   با.. كا.. بورته  باكابورته. هوده بالظبط اللي انا شفته حِفنه من البلابيص ومش لابسين حاجه بردو غير المئسوف على  ثيابه المدعو بالمايوه واتاريني دخلت صفحة مولد سيدي العريان وانا مش عارف . ايه ده يا جدعان هو في ايه ؟ كل اصحاب الواد من الخناشير , اني الاقي جنس حُرمَه ؛ ابدا , طيب اي حاجه فيها( ته) مربوطه حتى  ؛ لا ممكن ابدا. وطبعا واحد زي ده هيبقى الاستيتس بتاعه ايه غير ((انتوا فاكرين ان احنا بس  اللي كده ....؟؟  لاااا دا احنا كتيير)) كل 

 ده عادي وقدرت استحمله. الكارثه بقى تكمن ف الاتي : لقيت كذا صوره لاتنين رجاله بيتزفتوا على دماغ اللي جابوا امهم وبيبوسوابعض .بسسسسسسسسس وعندها  يا جدعان مقدرتش امسك نفسي الا وانا برجَّع  اصل انا الصراحه اتقرفت اوووووووووووووووووووووووووووي اوووووووووي من المنظر  فقلت لازم اقرفكم معايا علشان تحسوا باللي انا حسيته  بس يا جماعه وخت  سيفي  و حصاني وقلت يا فكيك وطياره على صفحتي الرئيسيه لاعود الى بروفايلي سالما ومقدرش اقول حاجه ف النهايه   لاخوانا البُعَدا غير (( ربنا يهدي )) و

 (( إذا بُليتُم فإستتروا))

اما عن العجيبه التانيه فإنها : ( مدام تي تي بتخرط بصل  ) وده طبعا مش الاسم الحقيقي للصفحه علشان محدش ياخده الفضول ويروح يعمل سيرش ويشيلني ذنوب 

با ختصار اقتراحات الصداقه والاعجاب من الفيس بوك والفضول  كانا وراء دخولي الى تلك الصفحه المشبوهه ))  

ولاني استغربت الاسم جدا فقلت اما اشوف ايه الموضوع ودخلت الصفحه واذا بردو بالمفاجاه !!!!!  لقيت ايه 

ع البروفايل ؟؟  خير اللهم اجعله خير: أنثى بيضاء    هيفاء    غيداء     تبدو ف التلاتينات من عمرها  فرحانه جدا بجسمها ترتدي قميص نوم احمر ساتان وكل شيءٍٍ انكشفن وبان واذا بها تستعرض اللحم الابيض المترهل  من خلال قميص النوم المتهلهل اللي كله شبابيك ومناور

ومطبات ومحاور  وكفايه كده بقى عشان عييب فإذ اكتشفت م الوهله الاولى ان مدام تي تي بتخرط بصل منجحتش ف الكيميا فغيرت نشاطها وبقت بتشتغل ف  الاغراء قصدي ف الاحياء وبالرغم من ان الست تي تي( بتمتهن) احط المهن الا انها شِديدة الصراحه  فكاتبه جهة العمل  : كل بيوت الدعاره ( موظفه وطالعه

اعاره) و قايله انها ما بين قوسين مدام , يعني الست عداها العيب وقلع. يعني كله على عينك يا فاجر وكمان صريحه جدا ف  طلباتها وكاتبه للعلاقات الجاده مش التهريج يعني مبتحبش العيال السييس ولا الرجاله البُق ع الفاضي اللي عاوزين يقضوها تليفونات و بس . وده يأكدلنا ان الست عندها مزنق ف الحياه قصدي عندها مبدأ : ألا وهو (( الرجال أفعال .. لا أقوال)) 

وفي مزنق تاني بردو بيقول  (( الرجل مش بس بكلمته .. الرجل  بدراعه و جسمه وقوته )) وكفايه كده عشان الرقابه

وطبعا صراحتها (الشِديده) لا تنفي كونها (( ماديه حقيره )) لان المغفل طبعا زي الضُغُف لازم يشحنلها

كارت محمول بمبلغ وصدره علشان يتلاعب معاها طبقا لمزنق ( احلبني شكرا ) . وده يأكدلنا لتاني مره ان الست   

تي تي بتكدس المزانق قصدي بتقدس المباديء كلها ف يوم واحد ومبدأها المره دي اغتصابي (اقتصادي يعني) وهو(( أبّجني  ..... تجدني )) ومش بس كده دا الست تي تي بتقدم خدمه ليليه طويله مساهمة منها بشكل (فَعّال) في حل أزمة مرورالقاهره وعلى المقيمين خارجها (( موافاة جديد التظبيط)) تفاديا للتلخبيط علشان الست فاجره وقديمه وخبره ومبتحبش الرجاله الخام اللخمه 

وطبعا  الاستيتس بتاعها هيكون ايه غير 

((هو ده الزبون ؟؟ ))  

             او    

  تي تي بتواكب العصر 

    ومتاحه لكل مصر

فيس بوك وايميلات وشات

 بس انت ف الاول هات 

 اسمَّعك موواويل وآآآهااااااات

يا نهار اسووووووووووود... دا فعل فاضح ف الانترنت العام

هومش دا بردو يا ساده  اللي اسمه - استغفر الله العظيم يارب - تسيير للدعاره

او الترويج للفاحشه 

هو اسم الله عليه  بوليس الاداب فين ؟؟؟

لالالالالالالا استنوا

انا لزمن بقى اطلع  اذكى من الدكتور علاء صادق ومجبش سيرة الداخليه ولا انطق اسمها على طرف لساني ولا اقول مثلا ان قلة ادب مدام تي تي تندرج تحت ما يسمى بالجريمه الالكترونيه اللي على ما اذكر والله اعلم ان في قطاع كامل ف وزارة الداخليه بظباطه واجهزته وشاشاته ولاب توباته مخصص لمكافحة هذا النوع من الجرايم

والست يعني مشكوره كاتبه موبايلها وايميلها يعني  بمنتهى السهوله يجيبوها من قفا امها ويعلقوها من ... من .. كُمها  

بس يبدو انهم مشغولين شويه ومش فاضيين

اويمكن عارفين مدام تي تي بس سايبنها تخرط بصل براحتها عشان الطماطم غاليه عليها حبتين 

واول ما الطماطم ترخص هيقبضوا عليها  علطول

يا  خرابي عليكم دا انتوا عالم سَو ... دايما كده تسيئوا الظن بالناس

حسبي الله ونعم الوكيل.. مش فيكم

وزي ما قلتلكم اننا عارف ان الفيس بوك ليه استخدامات تافهه واستخدامات جاده

بس مكنتش اعرف خاااالص ان ليه استخدامات وسخه بالشكل ده 

نيجي بقى للعجيبتين ( التالته والرابعه ): الصراحه هُمَّ بايخين فمكتبتهمش

بالنوسبه بقى للعجايب من( الخمسه للسابعه) فالحمد لله ... الحمد لله لسه لحد  دلوقت

منولتش قرف معرفتهم

 ومش عاوز اعرفهم اشاسا يعني

 .((وبعد كل ده كان لازم اغير اسم الموضوع واسميه (( مصايب الفيس بوك السبعه 

بس قلت لأ سيبه زي ما هو عشان عامل الجذب الجماهيري

وف النهايه احب انصحكم نصيحه فيس بوكيه

 ((البروفايل اللي يجيلك منه الريح  ؛   اعمله اجنور واستريح))

وحسبي الله ونعم الوكيل

فيك يااا يااا يااا .....يا فخري

شكراااا 

وسلامه عليكم

شكل ضحكتي

من كُتر همي نسيت شكل ضحكتي     

ويا دوب عينيا بتنشف فيها دمعتي     

إلا والاقي دُنيتي عمَّاله بتمَوِّت فرحتي    

  وف زحمة القسوه خايف لا تتوه مني رقتي

يحصللي اللي يحصللي

بَدوََّر ع الحب طول عمري     

لو حد يعرف مكانه ياريت يقوللي

مش مهم فين او ازاي الاقيه    

المهم الاقيه ويحصللي اللي يحصللي

بيقولوا الغربه مُرَّه

بيقولوا الغربه مُرَّه

واللي مَدقهاش 

مدقش طعم العلقم

اللي مُرُّه ما يتنساش

بيقولوا الغربه صعبه

واللي مَجَربهاش 

مَعرِفش معنى القََهرَه 

اللي عمره مَحسهاش

  بيقولوا الغربه قاسيه 

   واللي مَعشهاش 

ما حسش بوجع الجرح

اللي عمره مَينشَفاش

  بيقولوا الغربه وحشه

واللي عاشها ما بينسهاش

 بتعَلِّم ف نَفسُه علامَه

 الدهر كله ميمحيهاش

بيقولوا الغربه حلوه

      عجيبه!!      

دي بقى ما سمعتهاش

يمكن عشان فلوسها  

    .. بس بردو 

 الغربه مش ببلاش

وِحده وعذاب وضنا 

نداله , خيانه و وَطيَنَه

وحاجات كتييير مبحبهاش

وهتعمل ايه يا مسكين

مكتوب عليك الغربه

ويا تبقى يا متبقاش

 بيقولوا كفايه غربه

لا يضيع عمرك بلاش

 ولاَّ اللي جَرَّبها فعلا

 خلاص ما بيسلهاش

   مش حبا فيها لأَأَ

 لكن عشان مضطر   

يا عيني الحَوجَه مُرَّه 

وياريتك ما احتجتهاش   

  بعت نفسك رخيص

   وياريتك مبعتهاش

ضحيت يا حمار بسعادتك

 ولّا سعادتك متسواش

   لو جاتلك فرصه ترجع 

   امسك فيها متسبهاش

لا تعيش طول عمرك بِتشقى 

   ويا حزين ما تتهنّاش                          

                         ...سألوني

 هو انت اصلا شفت غربه ؟ 

 قلتلهم : لا والله ما شفتهاش

     بس غُربتي جوَّا مِنّي

      وياريتني معرفتهاش

أصل الغربه مش ارض ووطن

    او فراق الأهل والخِلّان

    دي الغربه فِعل الزمن

    فِ إمتهانك يا إنسان

الغربه احساس بالضعف

  اوشعور بالاستسلام

   الغربه لحظة ندم 

   ع العمر والاحلام

   الغربه جوه منك   

في معاني ضايعه منك

 تدوَّر عليها كتيييير 

ويا خساره متلاقيهاش 

    ما هوممكن  

   تكون ف بلدك 

 وسط ناسك واهلك

 وتدوَّر جوه نَفسك

يمكن تلاقي نفسك

وبردو متلاقيهاش

     وهي دي الحياه   

  ساعات تدِّيك سِرها 

   وكتييير متفهمهاش  

    ومِنك تاخُد حقها

ما انت اصلك مَتلزمهاش

     وهو ده طبعها  

فِ الفرح متلاقيهاش

وف ِالجرح متتوصاش

   مستغرب يعني !!

هو انت لسه متعرفهاش

ما هو ده اصلها

دُنيا ... دَنيَّه

وغير كده متوصفهاش

مسألتش مَرَّه نفسك 

هو احنا ليه مَبنكرهَّاش

متفكرش كتيير ف الحل

لإنك سَوءاً حلتها

او حتى محلتهاش

هي دي مُتعتها

كده أو كده لازم تتعاش 

بيقولوا الغربه مُرَّه

واللي مدقهاش 

مدقش طعم العلقم

اللي مُرُّه ما يتنساش

وأنا غربتي جوه مني 

وياريتني ما إكتشفتهاش

..... 

وسلامه عليكم

بفضلك يارب وكرمك

                                     احساسي بالغُربه هَدّني
                                    للإكتئاب والعُزله شَدّني
                                   بس بفضلك يارب وكرمك
                                      من عذابهم رحمتني

مبقتش مصدق نفسي

يبدو ان في كائنين فضائيين ضلوا سبيلهم الى مدونتي المجهوله  وتقريبا كده همَّ جم غلط
لأ مش تقريبا دا اكيد لان واحد منهم من  الولايات المتحده الامريكاويه وتحديدا من نيو جيرسي وده طبعا معرفش ايه اللي جابه هنا اساسا .- ما علينا - والتاني من دولة الامارات العربيه الشجيجه وتحديدا دبي ودا انا شاكك ف هويته 
مش مهم ... 
المهم ان المدونه نحسها اتكسر و الرِجل بدات تدب فيها وبدات تتعرف والحمد لله بقى ف ناس بيزوروها  ..آآه(( ناس )).. في حاجه ؟؟ حد عنده مشكله ولا حاجه
هم صحيح اتنين يُتَمى اللي شرفوني بس عادي جدا  مشوار الالف تعليق بيبدا بنقطه 
والمصحف دا انا اللي هيجيلي نقطه 
ان حد يعبرني بتعليق  ..أبدا ابدا 
يعني هو انا يعني بروح اهلي فا تح  ام المدونه دي علشان اقعد اهاتي مع نفسي
ماشي يا بني آدمين ... وربنا لَوريكم  ويا انا يا انتوا ف ام المحروقه دي
اما كنتش اخليكوا تزحفوا ورا المدونه دي زحف مبقاش انا وتِجروا ورايا كده علشان انزل بوست جديد بس بعينكم .. صبركوا عليا  ... التقيل لسه مجاش
بس سيبكم انتم  ما بيني وما بينكم كده من غير ما حد يسمع مش قادر اقوللكم  كنت فرحان قد ايه وانا بفتح باب المدونه كده وداخل برجلي اليمين  فإذ فجأتن لقيت اتنين من البشر اتكرموا واتعطفوا وزاروا مدونتي المتواضعه
 مبقتش مصدق نفسي  وانشَكََحِت اساريري واشرأبت نفسيتي  وبقيت مظأطط يعني ومحدش والنبي يسالني  يعني ايه اشرأبت علشان انا اساسا معرفش
يادي الفضيحه يا جدعان كل ده علشان اتنين بس زاروا المدونه ولا علقوا ولا نيله اومال هعمل ايه بس لما يجيلي بتاع يجي خماششر تعليق كده ولا حاجه.... يالهووووووووي دا انا كان يغمن عليا ... يغمن عليا يغمن عليا 
المهم اكتملت فرحتي لما لقيت تعليق صديقي محمد خيري ف الفيس بوك على المدونه بتاعتي وما اوصفلكمش بقى  ( مدح واطراء وثناء ورانيا ودُوله ورمزي  والستات كلها يعني)  فقلت  : الواطي مش كان يعلق ف المدونه احسن ويعملي اي منظربدل ما انا شكلي  بقى  شراب كده . بس قلت معلش يا ظهر مسيرك ف يوم تقع ف ايدي
خيري (حبيب قلبي ) وربنا بهزر  اوعى تزعل انا بَهرَّ أ طبعا 
 دا انت الوحيد اللي عبرني بس اوعدك لما المدونه تشتهر واغتني بقى وربنا ما هعرفك.....هأ هأ هأ ضحكات متقطعه شريره
حبيبي يا خيري يا رافع من مدوناتي 
شفتوا يا حلوين اللي بيعلق عندي بعمله ايه ؟؟ بقول اسمه ع الهوا وقدام ملايين المدونين بصيحله جامد يعني .. طخ طخ طخ
وعلى راي هنيدي  ( اهي بدات تندع ) وان شاء الله
ان شاء الله ان شاء الله ف القريب العاجل جدا اكيد حد هيعبر اهلي
والمدونه دي هتتمردغ تعليقات ومبقاش ملاحق ارد  وأَ تَنِّك  عليكوا بقى...


كفايه كده عليكوا النهارده 


 سلااام 

( يا رب يا ساتر ( اولى عاداتي التدوينيه

بما اني مدون جديد وحديث العهد بعالم التدوين الالكتروني فده طبعا خلاني اقضي يوميا عدد من الساعات ليس بالقليل ف استكشاف مدونات الاخرين والدعبسه عن الجيد منها وبالرغم من ان في كم مدونه كده شدوني وقررت ارتيادهم بصفه دايمه الا ان لسه عدد كبير جدا من المدونات معرفش عنها حاجه   بس جاري البحث والدعبسه ..

المهم  ... اثناء تنقلي بين المدونات بتستوقفني بعض المواضيع الكويسه فبينئح عليا الكلام  وابقى عاوز اعلق

طيب ازاي ؟؟؟

دا صاحب المدونه ولَّا صاحبتها لا يعرفوني ولا اعرفهم   .. طيب و العمل ايه ؟

فقررت اني ادخل اي مدونه بحركة شياكه ولطافه  كده على غرار دخول بيت غريب بادئاً

بالنحنحه (احمممم ) مصحوبه بتسقيفتين كده ع الايد وتليهم العباره الاشهر ( يارب ياساتر ) يا اااهل الدار قصدي... يا اهل المدونه... ثم تأتي تحية الاسلام قائلا  السلام عليكم وساعات بقول سلامه عليكم.

   نيجي بقى لاهم مرحله وهي مرحله التعليق  !!! طيب دلوقتي انا استاذنت وكله تمام  ..- بييس يعني - وبعدين ؟؟ أنيِّل  ايه انا بقى 

؟؟ عاوز اعلق بس مش عارف مقلق كده ومش مرتاح 

فقلت بردو ياواد يا محمد يا اخويا استاذن تاني مفيش مشكله 

دا حتى الادب فضلوه عن الفجل  فبقيت اسال سؤال صغنتوت  كده ( هو انا ممكن اعلق ؟؟) واقوم  جاي رازع وراه البُقين دول (طيب تمام شكرا ) على اساس ان حد عبرني وقالي اتفضل  .. كده وكده يعني  ما انتوا فاهمين اللي فيها بقى .. بغني وارد على نفسي ...

بس يا سيدي اويا ستي -عادي يعني - وهاتك يا دَش  

أرُص التعليق المحترم واخلع بقى قافلا الموضوع ايه ( قافلا دي ) اسمها ناهيا الموضوع بعبارة  ( شكراا .. استأذن أنا بقى ) وبردو سلامه عليكم 

والحمد لله لحد دلوقت الطريقه دي واكله معايا وجايبه نتايج زي الفل ولسه محدش احرجني وقالي اجري يالا من هنا رُوح العب بعيد والحاجات الوحشه اياها دي

ربنا يستر بقى!!!!!

آآآه افتكرت  .. بعد ما كتبت الموضوع الظريف اللطيف ده قلت (فعقل بالي)  - حاجه كده زي مابيني وبين نفسي - للي ما يعرفش معناها  .. عادي بقى احنا اخوات ..  ام هند ؛ قلت فعقل بالي ألا هو يا واد يا محمد بيه هم َّ اول اما اخترعوا المدونات  دي كان حد يعرف حد ؟ طبعا  لأ .

اكيد كان حد بيكتب موضوع وحد تاني خااااالص ميعرفوش بيعلق عليه وهكذا  وهلم جَرَّ لحد ما الناس بدات تعرف بعضها  فقلت طيب وايه لزمته العك والرغي اللي انا عمال ادح فيه من الصبح ده  طالما الحكايه طلعت سهله كده . يعني واحد يكتب والباقيين يعلقوا .. عادي جدا ا ولا الحكايه بقى مستهله احمم ولا داستور  ولا الجو البلدي دا خالص 

ايه الليله السوده دي أما انا طِلعت واد ((( تيييييييييييييت )))) بصحيح 

بس ... عيييييييب !!! انا اللي اشتم بس 

ورجعت اقول ( تاني ) فعقل بالي  طيب ما التدوين سهل اهه يا جدعان 

هي كيميا يعني (( على فكره الكيميا دي تخصصي ))  المهم بقى اكتشفت بعد طول انتظار ومعاناه رهيبه رهيبه ( الحقيقه المره) ؟ حقيقة التدوين  وخَلُصت  الى الاتي :::  ايوه  خلصت الى الاتي ::::: خلصت الى الاتي  :::: طيب طيب بالراحه كنت بعمل شوية ( ساسبنس ) . المهم  خَلُصت  الى الاتي :::(( هو التدوين إيه غير  بوست وتعليق وشوية أفكار فوق  بعض ))   وطبعا حاجات تانيه كتييييييييييير بس كانت هتبوِّظ الأفيه فمكتبتهاش .

وبعد اولى ايامي التدوينيه الالكترونيه اكتشفت بردو ان
(( النت .... كِيف و التدوين ... ادمان ))

 وقررت اني ان شاء الله  ...ان شاء الله لما آجي أعلق ف مدونة حد معرفوش  هكتب بردو (( يارب يا ساتر ))  ما خلاص بقت عاده ... ودي مش اي عاده  دي (( اولى  عاداتي التدوينيه ))... .. ....  وربنا ما يقطعلكم عاده

 وع فكره بقى كل الكلام اللي هنا ده نتيجة قدحي لِزناد فِكري وزِنات علوي  وزِنات صدقي وكل الزينات اللي ف الدنيا

يعني اللي هيلطش كلمه ولا كلمتين 

وربنا لَولع ف نفسي وف المدونه

واذا كان عاجبكم

يجطع النت ع النتيته  ع اللي عينتتوا عليه

استأذن انا بقى

بس خلاص وشكرن

سلامه عليكم

يا خوفي من صدمتك

                                  كان نفسي أحس بحنيتِك  

                                    واشوف بعيني لهفتك 

                                  ويهون عذابي ف لمستك

                                 بس يا خوفي من صدمتك

                                 لما تشوفي وَلَدِك مريض

                                 هتموتي عليه من حسرتك

هو في إيه ؟؟

يبدو أن سقف الحريات  اللي صدَّعونا بيه إتهد على دماغنا ودماغ اللي خلّفونا. فعلى غير(عادة النظام ) من القَمع الشيك و المغلف بورق سوليفان ؛ إلا أنه هذه المره  أطلَّ علينا  بوجهه القبيح ليمارس هوايته المفضله بفجور شديد  من كبت للحريات وإخراس الألسنه بل و أحيانا قطعها مما دفعني لكي أقول (هو في إيه ؟؟ ) لأن عهدي  بنظامنا المبارك ذو العقل النظيف والفكر الرشيد  والعيشه اللي كلها عز ف عز : هوعهد                                                       الذكاء وخفة الإيد والضرب تحت الحزام لكن المره دي كله على عينك يا تاجر واللي ما يشتري يتفرَّج فبعد أن كانت الضربات فُراداى وخفيف خفيف بدايةً من الدكتور ( يوسف القرضاوي ) مروراً بالاعلامي (حمدي قنديل ) والاستاذ ( عمرو خالد ) وغيرهم الكثيرون إلى أن آل حالنا لهذه الدرجه من(الاباده الجماعيه ) والقتل المعنوي لكل مَن له رأي وفِكر يخالف او يعارض النظام وتبدأ سقطات النظام واحده تلو الاخرى ليتهاوى سقف الحريات الذي طالما تباهوا به.  وتَجيء الضربات هذه المره دفعة واحده متلاحقه وشديدة التأثير بدايةً من منع ( ابراهيم عيسى) من برنامجه بلدنا بالمصري وكذلك الحال مع ( عمرو أديب ) وبرنامجه القاهره اليوم ثم إقالة( ابراهيم عيسى) من الدستوربسبب مقالات الدكتور (أيمن نور )ومقالات (د/ محمد البرادعي )  وقبلها منع الدكتور ( علاء الاسواني) من الكتابه  في جريدة الشروق وحتى الدكتور (علاء صادق ) مُنع من الظهور على أي من شاشات التليفزيون المصري لإنتقاده  وزير الداخليه ولم يقتصر الأمر على منع الاشخاص بل وصل لمنع القنوات الفضائيه ( الدينيه )   ليصل     الامر الى قمة الفجور  والانحطاط                                                                                                                              وبِذكر الدكتور (أيمن نور ) والدكتور ( محمد البرادعي) اللذان لنا فيهما عِبره فإن كلاهما قد نال نصيبه من ( الاغتيال السياسي ) بل وصل الامر للتشهير بهما وده كله طبعا لانهم نسيوا نفسهم البهوات واتجرأوا على ( الذات الرئاسيه ) - ان جاز التعبير -  سامحني يارب

وفي النهايه لا يسعني سوى أن أقول 

ياعيني عليكي يامصر

جميله محبوسه ف قصر 

قصر الطاغوت والحاشيه 

وعصابه ملهاش حصر

يا صاحبي زعلان منك

            بين الصدمه والدهشه كان إحساسي
                 هو إنت فاكر ولَّا أكيد ناسي
              يا صاحبي زعلان منك بالرغم إنك 
            في يوم كُنتلي أعز عندي من ناسي

هو الفيس بوك إيه غير  لايك وشيير وشوية كومنتات فوق بعض

ياعيني عليكي يا مصر

                                         يا عيني عليكي يا مصر

                                         جميله محبوسه ف قصر  

                                         قصر الطاغوت والحاشيه

                                         وعصابه ملهاش حصر

النفس مستاءه

                       عهدتُ زمنَ البطشِ والظلمِ دوماً  
                         زمناً بغيضاً شاع فيه العيبُ

                      وصبرتُ على ضيق الحالِ عمراً  
                         ُمتفائل النظرة ِ للغدِ مُرتقب

                           وبذلتُ كثيرَ الجهدِ أملاً  
                            في حنانٍ قد بغاه القلب

                     وشق صدري إحساسٌ شديد البأس  
                         لقلبٍ بشيءٍ قد سُمِّيَ الحب

                          وحَلمتُ بعالمٍ غريب المعالم  
                          ماؤه الخير وأرضه العشب

                         ومضت سنون العمرِ شاهدةً    
                          على عشقٍ قد دونته الكتب

                           فهبَّت ريح الدهر عاصفةً     
                           أطاحت بحُلمٍ وكأنه الذنب

                        وشاءت الأقدارُ بغير ما أهوى   
                        فإشتعلت السماء وكأنها الشهب

                      وضاقت بيََّ الدنيا والنفس مُستاءه 
                      ُفلا تبكِ فبكل ما فيكي يعلم الرب