يا بلادي .. يا بلادي .. أنا بحبك يابلادي

Monday 11 March 2013

كيس دم


الرجل والست اللي اتبروعلي بالدم
الناس اللي دمها مِشي ف خلايا جسمي خليه خليه
على فكره انا معرفكوش 
معرفش اساميكم
معرفش دينكم
معرفش انتوا مين ولا بتعملوا ايه ف الدنيا
معرفش عنكوا اي حاجه 
كل اللي اعرفه انكوا انقذتوا حياتي
اني عايش لحد النهارده بفضل ربنا وبسببكم
ايام كتيرحياتي كانت بتبقى واقفه على كيس دم
او 6 وحدات صفايح دمويه
او كيس بلازما
كنت شايف ابويا وهو هيموت م العجز والحسره
وهو شايف ابنه بيموت قدامه عشان محتاج كيس دم
بس للاسف مفيش ولا حتى بكل فلوس الدنيا
تخيل دمك اللي انت اتبرعت بيه بالصدفه ده
هو اللي انقذ حياتي
هو اللي حَيا الامل ف قلب ابويا
تخيل ان اي حاجه حلوه بعملها ف حياتي 
انت بتُثاب عليها
كل مره ابويا بيحمد ربنا فيها انه شفاني
انت بتاخد ثواب
اي حد بيشوفني سليم بعد ما كنت جثه هامده
 فيزيد يقينه ف ربنا انه قادر على كل شيء
انت سبب فـ ده
تخيل كَم الناس اللي بتدعيلك لحد دلوقتي
عارف كم عيله مافقدتش عزيز عليها بسببك
انت فاهم يعني ايه تنقذ حياة انسان

برغم اني معرفكش ومعرفكيش
بس انا وناس كتيييييييييييييييييير
اوووووووووووووووووووووي
بندعلكوا وهنفضل ندعلكوا لحد
مانموت
ربنا يكرمكوا ويجزيكوا عننا كل خير

No comments: