- أنا نفسي أموت بقى .. أنا تعبت من الدنيا واللي فيها
* جرى إيه يابني !! إنت هتكفر ؟؟ ما تستغفر ربنا
- أستغفر الله العظيم يارب .. بس الموضوع مش كده والله
حاشا لله إني أكون معترض على قضائه
الفكره إني فعلا تعبت وعاوز أستريح
* تستريح من إيه بس ؟؟
- أستريح
من الناس .. من الخذلان .. من الإحتياج .. من الكره .. من الوجع .. من التوهه
من الخوف .. من الهم .. من الظلم .. من الخيانه .. من الشهوه .. من الفقر
من الطمع .. من الفشل .. من الجَزَع .. من المرض .. من الأنانيه .. من الضعف
من الذل .. من الغل .. من الكدب.. من القلق .. من الغفله .. من النفاق .. من الحقد
أستريح من إمبارح وأستريح من النهارده و أستريح من بكره
أستريح من كل حاجه
* بس ده قدَرَك ونصيبك اللي ربنا كاتبهولك .. ولازم ترضى بيه
- مهو عشان كده أنا عاوز أموت
أنا لحد دلوقتي ربنا رازقني الصبر والرضا
وبجاهد نفسي كتييييير جدااا وبستعين بربنا دايما عشان أفضل كده .. راضي وصابر
بس خايف أضعف
خايف يجي يوم وما أقدرش أصبر
خايف يجي يوم وما أقدرش أرضى
خايف أخسر كل حاجه
عشان كده أنا نفسي أموت
أموت وأنا ربنا كارمني بالصبر والرضا
* طيب تفتكر إنك لو مت هتستريح ؟
- أكيد هستريح
* طيب ما إنت ممكن لو مت .. تخش النار .. هتستريح إزاي بقى ؟؟
- أنا فعلا ممكن أخش النار .. بس مش هبقى زعلان ساعتها
عشان ده هيبقى عدل ربنا .. وربنا مبيظلمش حد
ربنا هو العدل
أي نعم أنا معملتش الحاجات اللي تخليني أستاهل أخش الجنه
بس ربنا رحيم أوووووووووي وكريم أووووووووووووووي
ربنا وحده هو الرحيم
ربنا وحده هو الكريم
ربنا هيعذبني شويه وبعد كده هيدخلني الجنه
هو قال كده - سبحانه وتعالى -
طالما ما أشركتش بيه .. هتخش الجنه مهما عملت
أنا عارف إن هو بيحبني ..عشان كده بيبتليني إبتلاءات صعبه
وأنا كمان بحبه أووووووووووي ومش عاوزه يزعل مني
* طيب طالما إنت بتحب ربنا ومش عاوزه يزعل منك
ما إنت فإيدك تخش الجنه من غير ما تعدي على النار
إشتغل من دلوقت على الهدف ده واصبر
دا جزاة الصبر كبييييييره أوووووي عند ربنا
- والله بحاول
إدعيلي إنت بس .. إدعيلي إني أموت
* بُص !! أنا مش هعرف أدعيلك بإنك تموت
أنا هدعيلك زي ما وصانا النبي عليه الصلاة والسلام
" اللهم أحيني إن كانت الحياة خيرا لي و أمتني إن كان الموت خيرا لي "
- " اللهم أحيني إن كانت الحياة خيرا لي و أمتني إن كان الموت خيرا لي "
No comments:
Post a Comment